ديوان الدموع الناطقة للشاعر جابر الكاظمي الجزء الاول في قصائد اللطم (1)

ديوان الدموع الناطقة للشاعر جابر الكاظمي الجزء الاول في قصائد اللطم (1)

محمد بن الحنفية

(البحر الطويل)

زيــــنب آنـــــه يــــمحمّد أريـــد اوصفلك الحاله

لمن طاح اخويه حسين رحــــنه بـسبي الجمّاله

* * *

يمــــحمد يــــــخويه اشـلون حاله البيها مرينه

لا وليان لا صـــــــيوان وبـــــهالحال ظلـــــينه

آنــــه ورمله وام كـلثوم ورباب وليله وسكينه

لمــــــن غـــــــابت الــــــوليـان ** صــــــرنه ابـــــولية العـــدوان

عــــــلينه حـــــرگــوا الصيوان

والــلي يــــــذبح الــــوالي بعد ما يرحم عياله

* * *

يـــمحمّد ابعـــينك شــــوف گلبي الدامي المخذّم

متصوّف ابـخــــــمس جروح ما ظن بعد تتبلسم

جـــــرح مــن سهم ابن كاهل گلبي برميته إتألم

الـــــعبد الله الــــــــسهم صـابه ** وبـــــــيّه أثـّـــــر اصـــــوابــــه

وصــــــفّه حـــــرمله صـــحابه

أبـــــو اليمه لون مطلوب توفي الطلب أطفاله؟

* * *

وجــــرح الثـــاني يـمحمّد من الأول أشد وأكثر

لفانـــــي ابـــطبرة العبدي الصابت هامة الأكبر

ولمن شفت عـــالغبره شبــيه المصطفى اتكوّر

اگـعدت ردت أحســـب اجــروح ** وروحـــــي رافــــگت روحــــه

وچــــــبدي اتـــــلاهب ابــنوحه

روحـــي امـــــتابعه الأكبر وآجالي اويه آجاله

* * *

وثــــالث جـــــرح يمـحمد وسيع وما أظن يلتام

لفاني ابـــــطبرة الأزدي الخــــلّت بــالگلب آلام

ولمن شفـت بالحومه طفوا شمعة عرس جسام

طــــــفوّا شمــــــعة اوجـــودي ** وجـــــاسم صــــــاح يـا عودي

دم التضـــــــحيه اشـــــــهودي

الــــوصيه ابــــدمه وفّاها وبالطف غرّب اهلاله

* * *

ورابــــع جــــــــرح يمحمّد ابعين النايبه اتشوفه

انصـــــبت ابــطيحت العباس لمن گطعوا چفوفه

ومشـــــاني سبـــــية گــــــوم لـلشامات والكوفه

صــــــواب العــــــمد ســـابيـني ** ودمــــــه اتــــــفايض ابــعيني

وســـــهم الــــشاطي رامــــيني

مــــن مـــنحر گــــمر عدنان عين الحرم همّاله

* * *

وخــــامس جــــرح يـــمحمّد كلف ما ينگطع دمه

لـــــفاني ابـــــسهم المثلث الصوّب چبد أبو اليمه

گـــمر دنـــــياي چــــان حسين عگبه ليلتي ظلمه

سهــــــم الـــــصاب چبد حسين ** صـــــارن بــــــالأثر سهــــمين

ابـــــگطع چـبده اگطعوا چبدين

ومثل الشمس راس حسين يزهر فوگ عساله

* * *

يــــمحمّد وحـــــگ عيـــناك مــا ألّمني كل الصار

هـــدموا على عيالي الدار روحـي انبنت الهم دار

مــــن شـــبوا خيـمنه بنار باجدامي سحگت النار

لاچـــــن الهـــــــظم روحــــــي ** وكـــــثّر ونّــــــتي ونــــوحـــي

وعـــــليّه هيّــــــج جـــــروحي

لمـــن شـــــفت اخـــويه حسين ثنّه عليه چتّاله

* * *

يـــمحمّد يريت اتشوف اخويه حسين لمن طاح

كل ظني تعــب جسمه ونزل من عالمهر يرتاح

ما ادري ابـــروحه أيـــجود وعليه حايم الذباح

يخـــويه مــــا حســــبت حساب ** جبــــــهته بــــالحجر تـــنصاب

ودم نــــحره يصـــــير اخضاب

ولا أدري بـــالمثلث الصـــــابه وگـــــطـــع دلاله

* * *

يــــمحــمّد لــــون ميــــطيح اخويه حسين جدّامي

مـــا چـان اهجــمت هالگوم عليّه وحرگت خيامي

ولون ما ينــــسلب جســـــمه مــــا تتسلب ايتامي

نـــــحره انـــــــگطع بــــالــبتار ** سلــــــبوا جثـــــته الاشـــــرار

والحــــــيّرنـــي لمـــــن صـــار

صــــدر حــــسين مــيدان وعليه جالت الخياله

* * *

يــــمحمّد يســـبع الخـيل ريت اتشوف ذيچ الخيل

من هجمت على الصيـــوان وعيالك تصيح الويل

ريت اتشوف ذاك الليــل من عسعس علينه الليل

اشـــــوف أطـــفال مســــلوبــه ** اشــــــوف خيــــــام مــــنشوبه

اشــــــوف الـــــحرم مـــرعوبه

خلــصت مـن النهار الفات إجاني الليل وأهواله

*****************************************************************************************

سر الله المكنون

(الهجري)

يـــا عـــلي ابــــحكمه وجودك خالق الكون انعبد

صــــاح گبـــــل الـوحي سيفك (قل هو الله أحد)

* * *

يــــا عـــلي من لطف ذاته الباري كوّنلك جسم

ونوّرك مــــن نـور علـمه وصرت مجمع للعلم

علي ومن رفعــــت عــلوّك صـاغلك هذا الاسم

وابــــتفاسير المــــعالي اســـــمك واسمه اتحد

* * *

يا علـــي كـــــوّنك ربـــــك من قبل نشأت الروح

وبين ساق العرش نــورك زاهر ابحكمه وضوح

عين لام وياء، خــــط القـــــلم اسمك على اللوح

الباري راد اسمك لاسمه أيــشابهه ابمعنه وعدد

* * *

يا عـــــلي مــن عالم الذر الك خصـصنه الولاء

أوفياء ويــــاك نــــبگه بـــــعهد حـــــبك أوفياء

اشلون ننــــقض بالعـهود والك شـهدت الأنبياء

بعهد حبك والولايه كـــــل نــــبي ومرسل شهد

* * *

يا عــــلي لــــوما ولائــــك مــــنغفر لآدم ذنـب

ولا ســـفينت نوح ترسي بذاك طوفان الصعب

وجدك إبــــراهيم شـــــاف گـــباله نار وتلتهب

قسم عالخالق باسمك واللــــهب منــــها خــمد

* * *

يا علي معجزة شخصك حليه من جوهر نضيد

وانــــبجح داود بـــــيها مـــن تـــــليّنله الحديد

وحـــــكمتك مـــــيزان حق الوادم بيوم الوعيد

تنكشف كل الخفـــــايه لـــــو عــلن يوم الوعد

* * *

يا علـــــي ســـــليمان مـــن گـلب صافي هتف

ولعرش بلقيس حصّــــل گـــــبل مـيرد الطرف

وابّساط القدره صـــــارت آيتـــه وبيها انعرف

غبـــــطة اســـــليمان إنته ومن بحر حبك ورد

* * *

يا علي عطر الولايه مـــــا يـــــــضاهيها عطر

من نفح روضة ولائك موسى اصــــبح مبتشر

سرّك الصـــــوّر عـــــــصاته افعى أكّاله سحر

نــــــورك بــطور سنين لابـــــن عمران انفرد

* * *

يــــا علــي أثــمار حبك بدت من مربع خصيب

والـرشــف من چاس حبك بالدهر قط ما يخيب

عيسـى لو ما رشف چاسك ما تشبّه عالصليب

عيسى مثــــل ادريس حكمه للعله بسرك صعد

* * *

يا علي اســـــمك يقـــــين الأنــــــبياء السالفه

كـــــل نــــبي ومرسل بسرك گدر يتمم موقفه

جلّت الخـــــالق قــــــدرته الأظهرك للمصطفه

معــــجزة إظـهـار شخصك صارت الكعبه مهد

* * *

يا عــــلي مهــــبط يقينك گبل ما يهبط الروح

ومجمل الآيــات وصفك والعزم مركز وضوح

اثلاثه وثمانـــين غـــزوه بسيفك تقدّم شروح

اتجسدت بيك الأصـــول وذو الفقار الهن عمد

* * *

يا علي للــــدين عــــزمك ضمن هذا الانتصار

سمعنه هاتف من البــــاري يهتف بكل افتخار

لا فــــتى إلاّ عــــلي لا ســـــيـف إلا ذو الفقار

يا هو مثلك للاعادي بوقـــــعت الخـندق صمد

*****************************************************************************

الحسين (عليه السلام) كعبة الثوار

(الهجري)

حسيــــن للــتضحيه اتطوّع مو أمر حتمي انفرض

ومصرعه بعــــالم الــعلوي گباله عاللوح انعرض

* * *

حســــيــــن يـــلهـج بـالشهاده من گبل آدم وشيث

هذا مو أمر اعتــــبـــاطي لا ولا خـــــدعة حـــديث

الباري ناداه من تشوف الديـــن بـــاسمك يستغيث

ضحي يحسين بوجودك لو شـــفت امـــره امتعض

* * *

مثــــل ما واعـــــده الباري لأبو اليمه بعينه شاف

ممتعض دينه ويحــــس بــــــمنهجه صار اختلاف

والإسلام أصــــــبح غـــريب إبّين ثُله من الاجلاف

اخــــذ گــــلب الـــــدين بيده حسين ويجس النبض

* * *

حسيــــن من شاف بحياته انخذل دين الله الحنيف

وموقفه ابــــين آل امـــيه تـــــغيّر وأصبح ضعيف

للــــرماح وللســـــيوف تــــقدّم بـــــنحره الشريف

وانــــرصد بــرج الشهاده وجفنه عالذل ما غمض

* * *

حســــين مــن مكه الشريفه رصد برج التضحيات

وعرف من يــــسيل دمــــه يـــــصير مشعل للأباة

ثــــار مــــن أجــــل العــــقيده وأبد ما ساوم طغاة

قـــــدّموا زيــــــنة الــــــدنيه لـقائد الثوره ورفض

* * *

رفض كــــل المــــغريات ويــدري لو بايـــع يــزيد

يــــصير أمــــر الدين قصه ومصحف الباري نشيد

لچــــن ثـــــار لأجــــل ديــنه وشيّده بگطع الوريد

عــــاهد يــــضحي بــــوجوده لدينه وأبداً ما نقض

* * *

لون مـــا ثــــورة حســـين الدين چان أمره انتهى

وثورته ما چــــان صــــــارت مدرسه لأهل النهى

حسين واحــــد مــــاله ثــــاني ولا شـــبيه يشابهه

واليــــريد يخوض نــــهجه يــــدفع المنحر عوض

* * *

بكل عــــصر تـــگدر تسير بنهج أبو اليمه الشهيد

طالما كل عصر يــــملك شــــخص مـن زمرة يزيد

والــــيريد يـــــعيش بــــالعز لا يــــمد للـــــذله ايد

والمــــلك إيــــمان صــــافي مــــن أبو اليمه اتّعظ

* * *

حســــين حـصّل عالشهاده وطاح بالمصرع جريح

وبـــالمباهل صــــار أعـــــظم من اسماعيل الذبيح

اشــــما يــــطول العمر يــــبگه دم أبو اليمه يسيح

وشــــرّف العالم العلوي ابنــــهضت لمــــن نهض

*********************************************************************************

ماذا جرى في الطفوف

انـــجول مــــيدان الطــــــفـوف ** واللي مــــا شـــــايف يشـــوف

جثــــث متــــــغسّله ابـــــدمــها ** وحـــــرم مــــا بـــين الصفوف

والــــلي مـــــا شايف يـــشوف

* * *

شوف يـــالماچنت شـايف حالة اعيال الرسول

أمســـت ابـــليلة الحادي عشر ماخذها الذهول

وجثث ولياهــا رمــيّه وتسحگ اعليها الخيول

وأمست ابدور الهــواشم غايبه ابّرج الكسوف

واللي ما شايف يشوف

* * *

شوف يالما چنت شــايف جـثث وبلايه رؤوس

امصرّعه فوگ الوطيه وتنحبس منها النفوس

وعالعواسل غدت تزهي مـنوّره مثل الشموس

ومن دمه نحور الشهاده للـسور كتبت حروف

واللي ما شايف يشوف

* * *

شوف يالما چنت شايف حــال بضــــعة فاطمه

أمســــت الـــــليلة غـــــريبه لا كـفيل ولا حمه

والكفلها اعــــله الـشريعه مغسّل بفيض الدمه

ورايته الچانت ترفـرف طاحت بگطع الچفوف

واللي ما شايف يشوف

* * *

شوف يالما چنت شــايف نـور وجه المصطفه

يـــشع مــن غرّة الأكبر لچن بـــالحومه انطفه

ولو ردت وصف الرسول ابوجه الأكبر وصّفه

بالحرب وجــه النـــبوه اتـــخضب بدم الحتوف

واللي ما شايف يشوف

* * *

شـــوف يــــالما چــنت شايف شاب بالدم حنته

تـشوف جاسم عالـــحرايب لـــمن صارت زفته

ورمـــله مــــن جـــمر المدامع وهّجتله شمعته

مــــعرس بوسط الحرايب زفته رماح وسيوف

واللي ما شايف يشوف

* * *

شـــوف يـــالما چنت شايف طفل بالنبله انفطم

هذا عبــد الله الـــرضيع النحره مگطوع بسهم

والـــرباب اشــــلون تـــــنظر للوريد ايسيل دم

طفــــل يـــــتغسل بدمه هذا من جور الصروف

واللي ما شايف يشوف

* * *

شــــوف يـــالما چـنت شايف جسم ذايب بالألم

وانــــظر الســــجاد لمّن حــــرگوا اعليه الخيم

أيـــــشوف خيل وعده ونار اتحيط ايتام وحرم

حاير بـــجمع الـــيتامه وغـــارت عليه الألوف

واللي ما شايف يشوف

* * *

ما شــــفت لــــيلة الحادي عشر بالحومه ظلام

شفت بس أنــوار تزهي وتشع من جسم الإمام

وبزغ من بـــرج الشـــريعه كوكب يشع للايتام

يعوّض عهــــــود الكفاله واخذ عالعيله يطوف

واللي ما شايف يشوف
***************************************************************************

قم يا أبا الفضل


(موشح)

إجت زيــــنب والضــــــعينه اويــــــاها ** گـــــوم يـــــا بـــــا الفـــــضل واتلگاها

* * *

يــــعباس انــــــدفنت اويــــاك الچفوف ** اكــــشف اتراب اللحد وانهض وشوف

هــــاي زيــــنب عوّدت لرض الطفوف ** تشكـــــي آلام الســـــبي لــــوليـــاهــــا

* * *

هــــاي زيــــــنب هاي عد گبر الحسين ** تـــــــنشد الــــــسجاد وتــشوبح العين

اتـــــصيح دليني بگبر عبـــــــاس وين ** إخــــــته مـــــا تـــــنسا وما يــــنساها

* * *

وأســـــــمع الســــجاد نـــــاداها بــدمع ** عـــــالنهر عــــــباس تــدريه منصرع

اويـــــاه زيـــــنب إجــت لـيك بيا وضع ** أيـــــهيّج جـــــروحك وضـــع ممشاها

* * *

زيـــنب اتـــــعنت الگـــــبرك معـــــوله ** للـــــنهر مـــــهرعه اويــــاها العـــايله

تـــــدري بـــــاختك منـــــك اشـــمتأمله ** گـــــبل جــــــابر تـــــسرع المــــلگاها

* * *

فــــوگ گبــــــرك هوت يا عباس هاي ** زيــــــنب وبـــاصرها عالعـــايله براي

اتـــــگلك أرد أحچـــيلك شسوّت عداي ** حگـــــها تـــشكي اليــــوم جور عداها

* * *

ولمـــــن شخصك عنها بالطف إنحجب ** وراس أبو السجاد عالرمح إنّصب

امخيّــــمك حــــرگوه والخــــدر إنسلب ** ولليـــــسر تــــــالي الشـــــمر نـــاداها

* * *

نـــــادتك صـــــار الــــيسر يا با الفضل ** ابــــرگبة الســـــجاد مــــن حطّوا الغِل

عگـــــب ذيــچ الهيبه لَنها اعله الهزل ** ونــــوت للـــــكوفه الــــعده بــمسراها

* * *

حـــــال زيــــــنب صــار من حالك أشد ** والشـــــماته أمـــــضه من سهم وعمد

باليـــــسر تـــــدريها طــــبت چــــم بلد ** وتــــدري چــــم طـاغي ابعنف حاچاها

* * *

وأشــــرف إعــــله الكوفه ظعن العايله ** بالشماتــــه الـــــناس إجــــت تستقبله

اعــــلينه كــــــلها بـــــالحقد مــتحامله ** وحــــــصّل ابــــن زيــــاد التـــــمناهــا

* * *

وأدخـــــلونه علـــــيه وشـاهدنه اللعين ** وگومه كلها ابّشــــرته مــــــستبشرين

صـــــاح اخـــــذنه ثـــارنه بدم الحسين ** وهـــــاي زيـــــــنب عــــــلي اسبيناها

* * *

وحــــگ راسك يــــــعباس اتــــــقدمت ** ليــــــه وبـــــهمه وجـــــــداره اتكلمت

گتــــــله آنــــــه بـــثار اخوتي اتوزمت ** ونــــــجحت الثــــــوره اللّــي فجرناها

* * *

خــــاب ظـــن الطاغيه ورد للشــــــــتم ** ينظـــــر الراس الحســـــين ويــــبتسم

گتـــــله مـــــجد حســـــين لتظن ينهدم ** هـــــاي عـــــزه وبـــــالدمه شـــريناها

* * *

ونشـــــد عـــالسجاد لن جاوبه بصوت ** انـــــفوس أهــــل الـدين لتظنها تموت

ويـــــبگه دم حسـين صيحه بلا سكوت ** وبالشهـــــاده الــــــغايه حـــــصّلناهــا

* * *

عگــــــب مـــــا خــــابت أمانيّه وجزع ** ومــــن الشـــــام كــــتاب لجوابه رجع

ومـــــن الـــــكوفه الظـعن متوجه طلع ** وبـــــنصرنه الـــــكوفه غـــــادرناهــــا

* * *

حــــال مسره الظعن تدري اشلون حال ** جـــــايره الحـــــدّايه ونحـــيفه الجمال

وأدمـــــت الرگــــــبة الـــسجاد الأغلال ** والــــحرم ســـــوط الــــشمر يــــبراها

* * *

مــــن وصــــلنه الشام شنوصف الشام ** چـــــم شـــــمر بــيها لگينه وچم قُطام

الشـــــام أهـــــلها متابعه اليعبد أصنام ** بـــــعيد وبــــــزهوة فـــرح شــــــفناها

* * *

الهـــا لاحـــــت روســـكم من عالرماح ** يزيد من أعــــلى القـصر مبتشر صاح

العـــيش طـــــاب لآل اميــــــه بارتياح ** مــــن لســـــانه الصيحته سمــــــعناها

* * *

إنــــغمر بـــــالنشوه وتغطرس بالنصر ** اتـــــصدر المـــــجلس أميــــر ومبتشر

أظـــــهر أحــــــقاده وتبــــــجح بـالكفر ** وگـــــال وقــــــعه بـــــدر عــــــادلناها

* * *

بيـــــــنه آمــــــر وأدخــــلونه المجلسه ** وراح يــــــتماده ابــــمرح بتـــغطرسه

اعتــــــمد لاســـــلوب التـحدي يمارسه ** وللـــــــنبوه اتـــــــنكّر لـــــدعواهـــــا

* * *

صـــــــار إلــــــي دور الچــــنت أتأمله ** وحــــــصلت الـــوگفه الأخيره الفاصله

ثـــــورة حســــــين البــــــدايه بــكربله ** وباليـــــسر للـــــــشام وصـــــّلناهـــــا

* * *

صـــــحت صـــوت ومنه ابن هند ارتعد ** يـــــبـــن اكّــــــالة الأكـــــبار إشــــبعد

چـــــتل إخــــوتي واليــسر وعد وعهد ** والعــــــهـــــود الديـــــن وفّـــــيناهــــا

* * *

إصــــحه مــــن نشوتك واسمع يا يزيد ** حسين نجـــــحت ثـورته بگطع الوريد

حســــين حــي ما مات ميموت الشهيد ** ودولتـــــك بـــــالثوره أنـــــهـــــــيناها

* * *

عــــگب چــــــتل حســـين أيــامك عدد ** يـــــا يــــــزيد وتـــــنظر الشـــملك بدد

اعـــــليك دور الـــــدايره ورايـــــك فند ** وبــــــنصرنه الــــــدنـــــيه كــــرّمناها

* * *

حــــــال أمــــــيه وأمره للناس انفضح ** وابــــــتده الســــجاد بــالخطبه وشرح

غـــاية الثــوره أو وصـل گصده ونجح ** وبخــــــطبتـــــه الـــــــناس وعّـــيناها

* * *

مـــــن الــــــشام لكربلا انوينه الرجوع ** وصلنـــــه واعله گبوركم نهمل دموع

للمـــــدينه اشــــلون لـــو ردنه الطلوع ** خويـــــه لعيــــــالك تــــــرد تــــرعاها

****************************************************************************

يا فرج الله

(موشح)

اعيونّنــــه ابـــــدمع الصبر فيّاضه ** والمجد ظــــلت ممــــــحله ارياضه

* * *

تظل تــــجري اعيونّه ابدمع الصبر ** وندّعـــي بــهالصبر حصّلنه الأجر

خدّرت أفـــــكارنه أحــــلام العــــمر ** نحس بالــــذل وعـــــليه نــتغاضه

* * *

الصبر عالذل عــــار دنـــيه وآخره ** والاعذار أضــــغاث نـــوم وثـرثره

الما طلب حگّه نصـــــيبه المسخره ** ولو حچـــــه الـوادم تحور ألفاضه

* * *

بالصبر نتـــــحجج ومـــــرّت سنين ** نغـــــض عــن الواجب ومتخاذلين

النه غـــايب دوم الـــه مستنهضين ** وما نأدي واجــــب اســــتـــنهاضه

* * *

لو صـدگ نستنهض ونبدي العتاب ** للإمام ونشتـــــكيله مــــن الغــياب

ايكون گبــــله للحـــرب نفتح الباب ** بالســـــيوف الــــلامعه الـــومّاضه

* * *

خــــل نكـــف ادموعنه وخل نستعد ** وخل نِــــلم هــــذا الشـــتات ونتحد

من دمــانه انــــروّي دوحات المجد ** وللعهد نثــــــبت صـــــدگ حفّاظه

* * *

مجـــــد عدنه محلت ارياضه ويريد ** نسگي أرضــــه الطيّبه بدم الوريد

حسين ما وصــــانه بس نلعن يزيد ** ونحفظ التـــــاريخ بــــاستعراضــه

* * *

أبـــــو اليــــــمه لمن استبسل وثار ** وبهدر دمــــه ضـــــمن هالانتصار

راد دوم انــــتابعه بهــــــذا المسار ** ومثـــــله لأهــــوال المحن خوّاضه

* * *

حسين لمن طاح بـــالمصرع جريح ** بصـوته چان ودمه يتحدّه ويصيح

الــــمسلم المـــــــتمايله هبة الريح ** مجــــد ديــنه إعله الحرب حرّاضه

* * *

والــــذي يمجّد شرف يوم الطفوف ** بالفكر خــل يدخل الحومه ويشوف

سبــــعه وثــــمانين تتــحده الألوف ** وبالوغــــه لبـــذل النــفس ركّاضه
***************************************************************************

مصرع العباس (عليه السلام)

(موشح)

الگــــمر عــــــدنان العــــمد من صابه ** خلّه زيــــــنب بـــــــالخيم مــــرتــــابه

* * *

مـــــن عـــــگب ما أمنــــت حال العيال ** وسكّنــــــت روع الـــــحراير والأطفال

للكـــــفلها اطـــلعت تشــــــكيله الحــال ** وبالدمـــــع رادت تـــــــضمد صـــوابه

* * *

معــــــوله اتــــــعنّت لـصوب المشرعه ** وروحها بهـــــــضم المـصيبه مروّعه

بالــــــصبر والحـــــلم زيـــــنب مدرعه ** وروح زيـــــنب للـــــــهضم مــــتهابه

* * *

اشــــلون وگفه اوگفت يم شاطي النهر ** حايمه اتــــدور عــــلى جــــسم الگمر

تـــــدري متـــــشمت بوگـــــفتها الدهر ** واعلــــه زيـــــنب كــــــشّرت انــــيابه

* * *

وصـــــاحت بصوت الگطع منها الدليل ** ويـــن جسمك يــــا مـــــن لزينب كفيل

التـــــفتت وشـــافت گـــمر هاشم چتيل ** والـــــعلم دم الـــــقياده خـــــــضـــــابه

* * *

لمــــن شــــافت حـــاله الها اليسر لاح ** ومن صـــميم الحزن گلب الحره صاح

يالــــــبنيت الــــــخدر ذاك الخــدر راح ** مـــن هـــــوت فــــــوگ الثــره حجّابه

* * *

مــــن إگـــــطعوا چفــــينك وطاح العلم ** إنــــــگطع بيـــنه وطاح صيوان الحرم

وانــــطفت نــــار الـظمه وگلبي انضرم ** بجـــــــــمر نـــــــار خــــــيامك اللهّابه

* * *

مـــــن لهـــــيب الخــــــيم والآم الحزن ** مصـــــوّب وملـــــتهب گلبي الممتحن

وحـــــگ عيــــنك يا گمر ما چنت أظن ** تـــــصير عــــــينك هــــدف للنــــشّابه

* * *

والعـــــمود الفـــــضخ بصوابه الجبين ** حنه ظـــــهر اخــتك مثل ظهر الحسين

امـــــدوهنه وأتـــــلفّت يــــسار ويـمين ** وصـــــحت تــــوّه الـــگدر حل مصابه

* * *

الــــــعمد آه العــــــمد خــــــلاني أحوم ** بكربـــــــله وأنـــــخاك يـــا عباس گوم

لــــــون ميــــــصيبك فــلا تهجم الگوم ** وللـــــخيم مـــــا تـــــوصل الســـــلاّبه

* * *

إعتـــلت فوگ النهر صرخات المصاب ** وألّمـــــت عـــــباس زيــــنب بــالعتاب

اشـــــا تـــــحشّم مـــا يرد الها الجواب ** الهــــا بـــــس الـــــصده يـــرد اجوابه

****************************************************************************

يوم عاشوراء

(موشح)

اشـــلون يــــوم اعــــله الـــنبوه وآلها ** مــــن طــــحت يحسين فــــوگ رمالها

* * *

اشـــــلون يوم اعله النبوه اشلون يوم ** البيه جســـــمك عــــالثره تغسله دموم

بمصــــرعك روح القدس محزن يحوم ** يـــــنعه روحك واوحى مــــا اوحـــالها

* * *

اشــــلون يـــــوم البـــــيه جدك ينظرك ** دمـــــك ابـــــترب الطــــــفوف ايعفرك

ابـــــعينه چــــنه ايشوف حزت منحرك ** وجثــــــتك شـــــــمر الخـــــنه اتثنالها

* * *

اشـــــلون يــــوم الماجره يبن الرسول ** اخــــرس لســـــان الدهر عنّه شيگول

صـــــار صـــــدر حسين ميدان الخيول ** جالت ومحّـــــد العـــــــنّك حــــالهــــــا

* * *

اشـــلون يوم مصاب وافجع كل مصاب ** واللي صابــــك بـــي گــلب والدك ذاب

اشد مــــن يــــوم الذي بهامته انصاب ** ومثـــــل دمـــــع امــــك دمـعته الهالها

* * *

اشـــلون يــــوم اشـــــلون حالة فاطمه ** الراسها مــــن نـــــحرك تخضبه بدمه

عــــاليتامه بـــــالمصيـــــبه امــــخيّمه ** وعگـــــبك لـــــزينــــب تـشارك حالها

* * *

اشــــلون يــــوم آلام واحزان ومـــحن ** بمـــــصرعك يحسين مـصروع الحسن

مثـــــلك اوداجــــه على اثباجه اشخبن ** مــــن انـــــرفع راســــك على عسّالها

* * *

اشـــلون يــــوم وزيــنب اتشوفك ذبيح ** گــــوم وادرك حالي يــــبن امي تصيح

طــــلعت اتـــــظنك يــــــبو اليمه جريح ** وعــــلى صــــوت الـــــــنخوه تتعنالها

* * *

اشــــلون يــــوم وشبــــــلك السجاد تم ** بين شـــــدّة حــــــالته وســـــلب الخيم

اعــــليه واعــــله الـعايله العسكر هجم ** اشــــلون جـــــوله وبـــــالمخيم جالها

* * *

اشــــلون يــــوم وغـيّر اوضاع الزمان ** لبســــت الـــدنيه عــليه ثوب الأحزان

دمــــع واشـــــجان ونحـــيب بلا هوان ** والأرض بــــي زلـــــزلت زلـــــــزالها

****************************************************************************

استنهاض وعتاب

(موشح)

يــــا شــــمسنه الــزاهره الوضّاحه ** ليـــل هــــجرك ننـــــتظر مصباحه

* * *

يــــا شـــــمسنه البـــالسراير مطّلع ** بظاهــــر الــــوادم أبـــد ما تنخدع

هــــاشمي فـــــرعك وأنزه كل فرع ** ورده مــــن طيـــــب الأصل نفّاحه

* * *

يا شــــمسنه الغايبــــه إبّرج الصبر ** يمته هالهــــجران يـــــبزغله فجر

نـــــار هـــــجرك بــالضماير تستعر ** ودمع فگــــدك للجـــــــفن جرّاحه

* * *

نــــعتب وهـــالعتب نـــدري ما يفيد ** بالعتـــــب جـــرح التخزّن ما يهيد

إشــــما نــــزيد الصبر محنتنه تزيد ** وأدمــــت الجبــــهات لـطم الراحه

* * *

اكــــبدنه مـــــن الــظلم آلام ومحن ** وإلك بالمــــحجوب كـلها اتوضحن

وچــنها الأرواح من الأبدان إبرحن ** وهالارواح مـــن الصــــبر بـرّاحه

* * *

إحنـــه للــــظالم فســـحناله المجال ** وتالي صــرنه انصيح يا ذله الحال

الما يسوگه المرضع وطيب الخصال ** بالعصي مــــا يــــنضمن إصلاحه

* * *

نـــدّعي ودعــوانه من نسج الخيال ** عدنه إيمان الــــذي إيـــهز الجبال

الجلد گلبه ومؤمن ايخوض الأهوال ** ويدخل الــــحرب ويـجول الساحه

* * *

غــرگنه بـالأوهام من كثر السذوج ** وإنحجبــــنه إبـضيمنه وذلة الموج

اسفينه المـــا تــــهم بملاطم الروج ** ترتــــمس مــــن تــــــكثر الملاّحه

* * *

لــــون نتــــكاتف عـلى حكم الطغاة ** ونمد گــــبل سيوفنه انحور المماة

ابـــد مــــا نـــنصاب ضيم بهالحياة ** ولا يكثـــــر الــــظلم سـود أشباحه

* * *

ولــــو صــــدگ نثبت جداره ونتّحد ** نوصل ابــــوحدتــنه ذروات المجد

لچــــن كـــــل واحــد ابرايه مجتهد ** وأصم أبكــــم عــن حچي النصّاحه

* * *

نــــدّعي ثــــوار لاچـــن بــس إسم ** نسينه ثــــارات أبـو السجاد الشهم

إبــــنهج أبــــيّ الضيــم يمته نلتزم ** وناخذ ابثـــــاراته مـــــن ذبّـــــاحه

*****************************************************************************

علي الأكبر

(موشح)

ليــــله صـــــدّت للمــــــعاره ابعــــينها ** اتصــــيح جثـــــه عـــــلي الأكبر وينها

* * *

اطــــلعت مــــن خــيمتها محنيه الظهر ** عالمـــــعاره ابــــــعينها شـــبحت نظر

لــــيله عـــــن الأكـــــبر اتــــريد الخبر ** والــــدمع مـــــتفايض ابجـــــفنيـــــنها

* * *

فــــاجده اصـــبي عينها وفاضت العين ** والدمــــــوع اتـــصيح الأكبر طاح وي

لــــن تــــــشاهد بالحرب واگف حسين ** ويــــــمّه جـــــثة الأكــــــبر اموذرينها

* * *

وشـــافت حسين أعلى جسم الولد طاح ** يبني عــــالدنيه العـــفه المظلوم صاح

وغــــده أيــــوسّم شيــبته ابدم الجراح ** واعــــله حــــال حســــين زاده ونينها

* * *

حسيــــن لمـــــخيّمه وجّـــــــه صيحته ** لـــــن يـــــشوف ابهمّه هاشم حضرته

شـــــار عـــــالأكبر حسيــــن وشـــالته ** للخيــــــم بـــــــالجثه متـــــعنــــــــينها

* * *

لـــــفوا متــــــعنينها وهيّـــــه اعتـــنت ** ليه واعـــــله الــــولد مـصيوبه انحنت

بالســـــــعاده فــــــازت امـــك وأمـــنت ** مــــــن اوهــــبت دمـــك لنصره دينها

* * *

وانــــته أول گــــمر مــــن هاشم تغيب ** يبني بالفــــردوس خــــل عيشك يطيب

ومــــن تـــــطب للجنه وابدمك خضيب ** الـــــزهره مـــن دمـــك تخضب جبينها

* * *

ليـــــله مــــن طـــــبت الفسطاط ابورع ** صـــابره وحــــتى الصـــبر منها جزع

مــــا تـــــحسّب ليله شاب الها انصرع ** لاچن اتــــحسّب بــــأمر حـــــسيـــــنها

* * *

عــــلى صــــــواب الهام دمع الأم جره ** اتحسّب أمــــر حســـين لو شح ناصره

يـــــنذبح ويـــــطيح مـرمي اعله الثره ** وتـــــنظرم عـــــالعايله اصـــــواويـنها

* * *

فــــوگ ابنــــها اوگــــفت ليــله ونادته ** هــــاشم لجســــــمك يـــــالأكبر شـالته

والــــدك يـــــا هــــو الــلي يحمل جثته ** لمـــــن اتحـــــيطه العــــده صـــوبينها

* * *

يـــــبني حـــــالة والـــــدك لـلصم تذيب ** وســــــهم المــــــثلث لـــــدلاله يصيب

ويـــبگه جسمه امخضب ابدمه وتريب ** وعگـــــبه ليــــــلها امـغربه وسابينها

****************************************************************************

فراق علي الأكبر

(موشح)

ليــــله بـــــالخيمه حــــزينه اشبـــــيها ** حسيــــن لـــــو الأكبــــر يــــعز اعليها

* * *

اشبـــيها ليــــله الــــودعت أول شباب ** عــــلي الأكــبر من بعد جمع الأصحاب

خــــايفه اعــله الولد من طعن الحراب ** تــــريده مــــن الــــحرب يــــرجع ليها

* * *

اشبــــيها ليــــله امگابله وجه الحسين ** تــــنادي اخبــرني عن ابني صار وين

وأبــــو اليمه اعله الحرب شابح العين ** گــــومي يـــــا لــــــيله اندعي ايناديها

* * *

طـــــبت لخيـــــمتها مــــحزونه اهتفت ** حـــــره يــــا رب ليــــك بــاللوعه لفت

هـــــالغريــــبه لـــدمعة الـغربة اذرفـت ** وقســــمت اعــــله الله بــــصبر واليها

* * *

يـــــا الـــــهي اوليـــدي الأكبر رده لي ** ابجـــــاه صــــــبر حسين وبغربة هلي

مثــــل رجــــــعت يوسف ارجعلي علي ** جــــــروح گــــــلبي ابشوفته ايداويها

طلــــعت مــــن الخيمه مفجوعة گـــلب ** تــــنهض وتـــــعثر ومـــاخذها الرعب

لــــن تــــشوف الــــولد رد من الحرب ** ابـــــفرحة المنــــتصر مـــــتــــعنـــيها

* * *

نــــادته ادريــــك مـــــلهوف ارجـــعت ** تـــــريد تــــــتوادع عگــــب ما ودعت

امــــك آنـــــه وبـــــدماك اتــــــــبرعت ** روح يبـــــني لــــــرگبتك ضــــــــحيها

* * *

يـــــالعزيز حســـــــين مــن عندك أعز ** لچـــــن عـن صبره الصبر عيّه وعجز

حـــــين الـــــك بــالحومه بن غانم برز ** صـــــاح شـــــده وصــــار الأكبر بيها

* * *

روح صــــــبـــــرلي ابــــوك وأمــــــنه ** واطلـــــع لحــــــومتك وامــرح بالمنه

مثـــــلي چــــــم حـــره بولدها مدوهنه ** ويــــجي ليــــــها حســـــين ويـــسليها

* * *

حـــــگه ابـــــوك الدمـــع من دم يذرفه ** وعگبك يــــــنادي عـــلى الدنيه العفه

حيـــــث بـــيك أيــشوف جده المصطفه ** وانتــــــه لــــــوصاف الــــنبي حاويها

* * *

اتــــعنه الأكـــــبر للحـــــــسين ايودعه ** أيــــــصبره لفگــــــده ويـنشف مدمعه

عگـــــــب ما ودعــــه اتـعنه لمصرعه ** ســـــاعه لــــــن لجثـــــــته امــوذريها

****************************************************************************

أنا زينب

(موشح)

آنــــه زيـــــنب هـــــاك إخــــذ اخباري ** يـــــالتناشد ليــــــش دمـــــــعچ جاري

* * *

آنـــــه زيــــــنب أنـــــه بـت سيد المله ** آنــــه بـــــت ســـــر الحـــمد والبسمله

آنـــه مــــجدي عـــــالمجد زاد وعـــله ** آنـــــه جبـــــرائـــــــيل خــــــادم داري

* * *

آنـــــه زيــــــنب آنـــــه بــضعة فاطمه ** عالمه مـــــــن أصــــــــلي مــا متعلمه

آنــــــه نـــــوري يشـــــع لعنان السمه ** وتــــــزهي مـــــن نور الهدى انواري

* * *

آنــــه زيـنب من ثدي العصمه ارضعت ** آنه بحجـــــور الـــكرامه تـــــرعرعت

آنه مــــن أصــــــل النــــــــبوه تفرعت ** ومـــــن نــــسغ طيـــب إرتون أثماري

* * *

آنـــــه زيـــــنب عــــالنساء إتـــرجّحت ** آنه بــــوشاح البــــــتول إتــــوشّــحت

آنـــــه مـــــن عــــــالم الـــذر تـرشّحت ** وخــــــذت مــــن سـر الجليل أسراري

* * *

آنـــــه زيـــــنب ولــــرسول الله أنتسب ** والأصـــــل هــــــاشم وعــــبد المطّلب

وبـــــالمصايب أُم الأحــــــزان انحسب ** ويّــــه الحســــــين اقــــــترن تــذكاري

* * *

افــتحت عيني وشفت ضلع امي انكسر ** وراس أبــــــويه بمسجد الكوفه إنطبر

وبمــــصاب الحـــسن صــــوبني الدهر ** لچـــــن بـــــعده مــــرتفع شــــــنياري

* * *

بــــزود اخــــوتي مــــرتفع شنيار إلـي ** وينـــــتخولي يـــــالعقيله اتـــــدلـــــلي

بخــــدرچ وبـــــالدين وصّــــانه عـــلي ** وزود اخـــــوتي مصـــــدر استبشاري

* * *

ومـــــن عـــــگب ذيــچ المعزّه والدلال ** تالي لن أنـــــظر اخــوتي إعله الرمال

چنـــــت مكـــــفوله وصرت أكفل إعيال ** والــــدهر صـــــاح إعـــــلنت اخطاري

* * *

حسيــــن لـــــو ما يفضخ جبينه الحجر ** وســـــهم المـــثلث يـــــصيبه بـــالأثر

مـــــا عـــــليّه اتـــــخيّم أخـــطار الدهر ** ونـــــار امـــــيه مـــــا تشــــب دياري

* * *

وراســــه عـــــالعسال لــــو مــا يرتفع ** ما تصل للخيــــم غـــــارات الجــــــمع

ولــــون چـــــفين الـــــگمر مـا تنگطع ** خــــدري مــــا يــــنسلب ويّه استاري

* * *

وگــــمر هاشم من هوه اعله المشرعه ** وشفت چـــــفين الكـــــــفاله مـــگطعه

اظلمّــــت الدنـــــيه ولفــــــتني الفاجعه ** ومــــا أميّـــــز ليــــــلي مــــن نهاري

******************************************************************************

حنان رمله

(موشح)

اويـــاك گـــــلب امــــك بــــرز يـا ريعه ** ومثـــــل جـــــسمك بالحرب تـــگطيعه

* * *

اويــــاك للحــــومه گــــــلب رمـله برز ** ومثــــل صــــوتك بـــــالميادين إرتجز

منـــشرح للـــــموت مـــا عيّـــه وعجز ** وصار مثـــــلك عـــــالحرب تـــطويعه

* * *

اتــــطوّع أيـــــلازمك وابـــــعهده التزم ** أمل عنـــــده وعـــالأمل شــــد واحتزم

گــــال عـــــن جســــام خل اكشف الهم ** هــــالفرع مــــن الحــــسن تــــــفريعه

* * *

الــــفرع إنــــته والحـــسن هوّه الأصل ** وهــــالفرع مــــن الأصــــل ما ينفصل

اويــــاك للمـــــصرع يـــــجاسم متصل ** وبايع المظــــلوم نفــــس البـــــيـــــعه

* * *

خــــل اعـــــطر جــــعودك بدمعه العين ** وخل أفـــــرّح خـاطري بصبر الحسين

بيـــــع دمـــــك واشـــــتري عزّه الدين ** ولا تـــــصدّع عمّـــــك بـــــتوديــــــعه

* * *

ولمّــــن اتـــــودّعه وتــــسفر عالحرب ** لا تــفكّر ودّعــــت رمــــله بــــغــــرب

گبـــــلك اعـــــله المــوت ودّيت الگلب ** ومــــن عـــــزم گــــلبك كسب تشجيعه

* * *

واعــــله سيــــــفك يــولدي شد اليمين ** مــــا يـــموت إلمِـــن دما يرتوي الدين

يبـــــني خــــلّد مــــجدك بمجد الحسين ** وهالخــــلود إحـــــتذر مـــن تضيـــيعه

* * *

لا تــــضيّع مجـــــدك وخــــــطّه بدماك ** وســــــاوي علّـــيـــين الجـــنان بعلاك

عـــلى لسان حسين صوت الحق دعاك ** إشما يكـــــلف الثــــمن كــــون إتطيعه

* * *

امطــــالبه بــــدمع الربــــه ودر الثدي ** توفي لــــو للــــموت ملهــــوف اتعدي

امـــــك وعــــاهدت لحســــــين افـتدي ** وهــــالعهد دمـــــك حبــــر تــــوقيـــعه

* * *

يبنــــي حــــنّي چــــفونك بدم الصواب ** وتظل شمــــعه مــوهجه بدرب الشباب

تعــــيش بـــــالأفكار مـــــن بعد الغياب ** نــــهج قـــــرآني بـــــأصل تـــشــريعه

* * *

ريــــت أبــــو الســـجاد يرخصني بأمر ** اويـــــاك أطــــلع للحرب وافدي العـمر

لاچــــن المـــعهود أنــــاصر بـــــاليسر ** واليــــسر أصعـــــب واشـــــد ترويعه

* * *